Gluaiseacht na Gaeilge

Roinnt grianghraif ó na réamhbhabhtaí den damhsa ar an sean-nós (Daoine Fásta) ag Oireachtas 07. Is féidir leis na daoine sin gluaiseacht!
Ó Oireachtas 07

Oireachtas na Samhna sroichte againn faoi dheireadh!

Tá an nóta seo urraithe ag an AA a tháinig i gcabhair orainn agus muid fós os comhair na Comdhála! Táimid anso i gCathair na Mart ar aon nós agus na sluaite inár dteannta. Tá seastán na Comhdhála díreach in aice an deasc ticéid. Buail suas chugainn - tá comórtas iontach á rith againn. Cláraigh saor in aisce leis an nuachtlitir, Eolas@Gaelport.com, agus bí san iomaíocht ar IPod Nano 4GB!
Beidh mé ag cur roinnt grianghraif in airde le linn na féile ach seo blas mar thús.

Ó Oireachtas 07

Ag súil le bualadh libh

Beidh mé féin (Roseanne!) agus mo chomhghleacaithe ag freastal ar an Oireachtas. Beidh seastán linn agus beimid ag díol fáinní agus ag glacadh síntiús don nuachtlitir. Buailigí suas chugainn agus beannaigí linn!

Deas buaileadh libh!

D'fhreastal mé ar ócáid a d'eagraigh Aoileann Nic Dhonnchadha, an t-oifigeach Gaeilge i gComhairle Chontae Átha Cliath Theas inné. Thug sí cuireadh do mhúinteoirí bunscoile agus meánscoile an cheantair freastal ar ócáid chun eolas a fháil faoi eagraíochtaí Gaeilge. I láthair bhí Conradh na Gaeilge, Comhar na Múinteoirí Gaeilge, Gaelscoileanna, An Gúm, Foras na Gaeilge, agus bhí ionadaíocht ann ón Seirbhís Leabharlainne sa cheantar agus an Oifig Chomhshaoil sa Chomhairle agus tuilleadh nach iad.

Chomh maith leis sin labhair Stiofáin Ó Deoráin ón nGúm faoin seirbhís íontach http://www.focal.ie/ agus (hallelujah!) faoin rud go bhfuil siad ar tí leagan nua-aimseartha de Gléacht a éisiúnt roimh Nollag. Tá a fhios agamsa céard tá Dadaí na Nollag ag tabhairt chuig oifigí Gaelport i mbliana. Cloisim sibh ag rá "Céard sa diabhal is Gléacht ann?" Aon duine a bhfuil an leagan MS-DOS den bhogearra seo tuigfidh siad mo ríméad. Is leagan idirghníomhach é de Foclóir Uí Dhónaill. Tá sé inchuardaithe agus is féidir gach leagan de gach focal a aimsiú (bíodh sin tuiseal, aimsir nó leagan den bhfocal mar is cuí) trí chliceáil luiche.

Ag an ócáid céanna labhair Carmel Nic Eoin atá i gceannas ar an Seirbhís Tacaíochta Dara Leibhéal don Ghaeilge san Ionad Oideachais in Áth Luain. Is seirbhís nua é seo atá curtha ar fáil ag an Roinn Oideachais agus Eolaíochta chun tacú leis na múinteoirí agus iad ag cur na n-athruithe i leith curaclam na Gaeilge, ina measca na marcanna breise don bhéaltriall, i bhfeidhm.

Labhair Julian de Spáinn ó Chonradh na Gaeilge agus Orla Nic Suibhne ó Sheachtain na Gaeilge freisin.

Deis íontach a bhí ann do ionadaí ó na heagraíochtaí Gaeilge aithne a chur ar mhúinteoirí an cheantair agus vice versa.